- 1 Padşahlar 17:1 - Tishbili İlyas Axava dedi: «Həyatında durduğum İsrailin Allahı Rəbbin adına and içirəm ki, bu illər ərzində mənim sözümdən başqa şeh də olmayacaq, yağış da yağmayacaq».
- Yəhya 16:13 - Lakin həqiqət Ruhu olan O gələndə sizi bütün həqiqətə yönəldəcək. O özündən danışmayacaq, yalnız eşitdiklərini söyləyəcək və gələcəyi sizə bildirəcək.
- 2 Timoteyə 3:16-17 - Bütün Müqəddəs Yazılar Allahın nəfəsidir və öyrətmək, məzəmmət etmək, islah etmək, salehlikdə tərbiyə etmək üçün faydalıdır ki, Allahın adamı hər yaxşı iş üçün tam təchiz olunmuş halda yetkin olsun.
- İbranilərə 4:12 - Çünki Allahın kəlamı canlı və qüvvətlidir, iki tərəfi iti olan hər qılıncdan daha kəskindir; canla ruhu, oynaqlarla iliyi ayıracaq qədər dərinə işləyir, qəlbin düşüncə və niyyətlərini ayırd edir.
- Mətta 28:18 - İsa onlara yaxınlaşıb dedi: «Göydə və yerdə bütün hakimiyyət Mənə verilib».
Peyğəmbər İlyas padşah Axavın qarşısına çıxanda, padşah yəqin ki, belə düşünmüşdü: «Bu adam özünü kim hesab edir ki, mənimlə belə danışır?» İlyas İsrailin pis padşahına Allahdan gələn bir xəbəri çatdırdı: bütün ölkəni bürüyəcək quraqlıq gəlirdi. Bu peyğəmbərliyin gücü İlyasın özündən deyil, onu göndərən Allahdan gəlirdi. İlyas imanlı bir insan idi. O, Allahla tək qalır, Onu diqqətlə dinləyir və Ona güvənirdi. Buna görə də o, cəsarətlə və əminliklə danışa bilirdi, çünki xəbərinin Mənbəyini tanıyırdı. Bu gün Allah bizimlə Əhdi-Ətiq peyğəmbərləri ilə danışdığı kimi danışmır. Lakin prinsip dəyişməyib: Allah Öz Kəlamı vasitəsilə danışır. İmanlı insan Müqəddəs Yazıları oxuyub dua etdikdə, Müqəddəs Ruh ona Allahın həqiqətini başa düşməkdə və onu həyatına tətbiq etməkdə kömək edir. Lakin Allahın həqiqəti yalnız bizim şəxsi inkişafımız üçün verilməyib. Rəbb istəyir ki, biz onu başqaları ilə də bölüşək — İsa Məsihə iman vasitəsilə lütflə verilən xilası elan edək və insanları Allahın Kəlamı ilə ruhlandıraq. Hər gününüzə Allahla ünsiyyətdən başlayın: Müqəddəs Kitabı oxuyun və dua edin. Müqəddəs Yazıların dediklərinə etibar edin, onları həyatınıza tətbiq edin və öyrəndiklərinizi başqaları ilə bölüşün. Biz cəsarətlə danışa bilərik, çünki xəbərimizin səlahiyyəti özümüzdən deyil, göydə və yerdə bütün hakimiyyətə sahib olan Rəbb İsa Məsihdən gəlir.
Düşüncə
Sizin danışdığınız həqiqətin qaynağına nə dərəcədə əminsiniz və bunu gündəlik həyatınızda necə göstərirsiniz?
