- Koloslulara 3:12-13 - Beləliklə, Allahın seçdiyi, müqəddəs və sevimli insanlar kimi, ürəkdən gələn mərhəməti, xeyirxahlığı, təvazökarlığı, həlimliyi və səbri geyinin. Bir-birinizə dözün və əgər birinizin digərindən şikayəti varsa, bir-birinizi bağışlayın. Rəbb sizi necə bağışladısa, siz də elə bağışlayın.
- Qalatiyalılara 5:22-23 - Ancaq Ruhun meyvəsi bunlardır: məhəbbət, sevinc, sülh, səbir, xeyirxahlıq, yaxşılıq, sadiqlik, həlimlik və özünə hakim olmaq. Belə şeylərə qarşı heç bir qanun yoxdur.
Allaha olan etibarımız artdıqca, Onun cavabını gözləmək və iradəsini qəbul etmək qabiliyyətimiz də artır. “Müqəddəs Ruhun meyvəsi” özünə səbiri də daxil edir. Amma bu o demək deyil ki, Müqəddəs Ruh bunu avtomatik olaraq həyatımıza yerləşdirir. O, bizim etibarlı Müəllimimizdir və böyüməyimiz üçün bizə güc verir. Ruhani meyvə isə zamanla — itaət etdikcə və Allahın iradəsinə təslim olduqca yetişir. Səbir o deməkdir ki, həm arzularımızla bağlı, həm də insanların yaratdığı çətinliklərdə Allahın vaxtını gözləyirik. Bu isə dərinləşən imanın nəticəsidir. Müqəddəs Ruh bizi həyat yolumuzda Allahın necə işlədiyini görməyə çağırır. Dua cavabları, çətin vəziyyətlərdən yaranan gözlənilməz xeyirdualar və Allahın pisi yaxşıya çevirməsi — bütün bunlar Ona olan etibarımızı gücləndirir. Allaha olan güvənimiz artdıqca, biz Onun həllini və nəticəsini səbirlə gözləməyə hazır oluruq. Əslində, Allahın suverenliyini dərk etmək səbrin inkişafında açar rol oynayır. Onun idarəsinə təslim olmağın mühüm hissəsi — Onun, Öz işini istədiyi vaxt etməsini gözləməkdir. Səbir bizdə təbii olaraq yaranmır. Amma Müqəddəs Ruh bizə güc verir ki, şikayət etmədən çətinliklərə dözə bilək. Unutmayaq ki, Allah yalnız insan baxışına görə “gecikir”. Əbədiyyət baxımından isə O, hər zaman kamil vaxtla işləyir.
Düşüncə
Bu gün həyatınızda hansı vəziyyətdə Allahın zamanını gözləməkdə çətinlik çəkirsiniz və bunu Onun iradəsinə təslim etmək üçün nə edə bilərsiniz?
