- Qalatiyalılara 1:11-17 - Bəli, qardaşlar, sizə bildirirəm ki, təbliğ etdiyim Müjdə insan qaydalarına görə deyil. Çünki mən onu insandan almamışam və öyrədilməmişəm, lakin İsa Məsihin vəhyi ilə almışam. Yəhudilikdəki əvvəlki həyatım haqqında eşitmisiniz: mən Allahın kilsəsini son dərəcə şiddətlə təqib edib onu məhv etməyə çalışırdım. Mən öz xalqım arasında olan bir çox həmyaşıdlarımdan yəhudilikdə irəli getmişdim, atalarımın ənənələrinə daha çox bağlı idim. Lakin məni ana bətnindən ayıran və Öz lütfü ilə çağıran Allah, Məsih haqqındakı Müjdəni xalqlar arasında təbliğ edim deyə, Oğlunu mənə aşkar etmək istədikdə, dərhal ət və qanla məsləhətləşmədim, məndən əvvəl həvari olanların yanına Yerusəlimə də getmədim, əksinə, Ərəbistana getdim və sonra yenidən Dəməşqə qayıtdım.
- Romalılara 12:2 - Bu dünyaya bənzəməyin, əksinə, düşüncənizi yeniləyərək dəyişin ki, Allahın iradəsinin – Onun üçün yaxşı, bəyənilən və mükəmməl olanın nə olduğunu ayırd edə biləsiniz.
- Yəhya 3:3 - İsa ona cavab verdi: «Sənə doğrusunu, tam doğrusunu deyim: bir kimsə yenidən doğulmasa, Allahın Padşahlığını görə bilməz».
- 2 Korinflilərə 5:17 - Beləliklə, kim Məsihdədirsə, o, yeni yaradılışdır; köhnə keçdi, baxın, hər şey yeni oldu.
- 1 Salonikililərə 1:9 - Çünki onlar özləri bizdən danışırlar: yanınıza necə gəldiyimiz, sizin də canlı və gerçək Allaha xidmət etmək üçün bütlərdən Allaha necə döndüyünüz haqqında bizə xəbər verirlər.
- Yəhya 1:12 - Lakin Onu qəbul edənlərin hamısına, yəni Öz adına iman edənlərə Allahın övladları olmaq səlahiyyətini verdi.
- Efeslilərə 2:8-9 - Çünki iman vasitəsilə lütflə xilas olmusunuz. Bu da özünüzdən deyil, Allahın hədiyyəsidir; əməllərlə deyil ki, heç kim öyünməsin.
Xilas olmağın nə demək olduğunu başa düşürsünüzmü? Həqiqi iman insanın həm düşüncəsində, həm də həyat tərzində dəyişiklik yaratmalıdır. Həvari Pavel Şama gedən yolda İsa ilə qarşılaşdıqdan sonra bir müddət Ərəbistana çəkildi. Xidmətə başlamazdan əvvəl o, Rəbdən öyrənməli idi. Eyni şəkildə, Məsihə yeni iman edənlər də xilasın nə demək olduğunu düzgün başa düşməlidirlər. Gəlin “xilas olmaq” ifadəsini izah edən bəzi anlayışlara baxaq: Yenidən doğulmaq: Bu, yeni bir başlanğıcdır. İman edən şəxs Məsihdə yeni yaradılış olur, yeni ruhani həyata və yeni kimliyə sahib olur. Dönüş: Dönüş dəyişmək deməkdir. Necə ki, bir valyuta başqa valyutaya çevrilir, eləcə də insanın həyatı Allahın təsiri altında dəyişməyə başlayır. Məsihi qəbul etmək: Xilas sadəcə Allahdan alınan bir hədiyyə deyil. Xilas o zaman baş verir ki, insan İsa Məsihə iman edir və Onu öz həyatına qəbul edir. Xilas insanın yaxşı əməlləri, səyləri və ya davamlı performansı ilə qazanılmır. Əbədi həyat yalnız İsa Məsihə iman vasitəsilə, Allahın lütfü ilə verilir. Bundan sonra Allah imanlını ruhən böyüdərək Məsihə bənzətmək istəyir.
Düşüncə
İsa Məsihi tanımazdan əvvəl necə yaşayırdınız? İndi həyatınızda hansı dəyişiklikləri görürsünüz?
