- Koloslulara 3:12-13 - Beləliklə, Allahın seçilmişləri, müqəddəslər və sevilənlər kimi mərhəmət, xeyirxahlıq, təvazökarlıq, həlimlik və səbirlə geyinin. Bir-birinizə dözün və əgər birinizin digərinə qarşı şikayəti varsa, bir-birinizi bağışlayın. Məsih sizi bağışladığı kimi, siz də bağışlayın.
- Qalatiyalılara 5:22-23 - Lakin Ruhun meyvəsi bunlardır: məhəbbət, sevinc, sülh, səbir, lütf, xeyirxahlıq, sədaqət, həlimlik və özünə hakim olmaq. Belə şeylərə qarşı heç bir qanun yoxdur.
Bu gün oxuduğumuz hissədə həvari Pavel imanlıları «mərhəmət, xeyirxahlıq, təvazökarlıq, həlimlik və səbirlə» geyinməyə çağırır. Başqa sözlə, biz bu xüsusiyyətlərlə hazır şəkildə doğulmuruq. İsa Məsihə bənzəməyi öyrəndikcə bu xüsusiyyətlər həyatımızda formalaşır — «bir-birinizə dözərək və bir-birinizi bağışlayaraq». Müqəddəs Ruh ruhani meyvənin həyatımızda yetişməsi üçün bizi sədaqətlə istiqamətləndirir. Səmavi Atamız isə bu xüsusiyyətləri tətbiq etmək və daha da inkişaf etdirmək üçün bizə imkanlar verir. Bu gün xüsusilə səbir üzərində dayanaq. Biz səbri çox vaxt dar mənada — sadəcə «gözləmək» kimi başa düşürük. Əlbəttə, gözləmək səbrin bir hissəsidir. Lakin səbir həm də dözümlülük və çətinliklərə tab gətirmək deməkdir. Pavel bizi «bir-birimizə dözməyə» çağıranda məqsəd sadəcə qarşı tərəfin daha yaxşı biri olmasını gözləmək deyil. Biz insanın çətinliklərindən keçərkən onun yanında ola bilərik, ona kömək etməyə davam edə bilərik. Biz qayğı göstəririk, dinləyirik və bacardığımız hər şəkildə xidmət edirik. Hər şeyi tez görmək istəyən bir dünyada səbir başqa bir insana verə biləcəyimiz çox qiymətli bir nemətdir. Allah səbri Ruhun meyvəsinə daxil edib. Bu isə göstərir ki, səbir hər bir imanlı üçün mümkündür. Hansı ruhani ənamlara sahib olmağınızdan asılı olmayaraq, səbirli olmağı öyrənə bilərsiniz. Allahın izzəti üçün və başqalarına xidmət etmək üçün səbri həyatınıza geyinin və onu tətbiq edin.
Düşüncə
Bu gün kimə qarşı daha çox səbir göstərməyə ehtiyacınız var və bunu praktikada necə həyata keçirə bilərsiniz?
