- Filipililərə 1:1-11 - Məsih İsanın qulu olan Pavel və Timoteydən, Filipidə Məsih İsada olan bütün müqəddəslərə, nəzarətçilərə və xidmətçilərə salam. Atamız Allahdan və Rəbb İsa Məsihdən sizə lütf və sülh olsun. Sizi hər xatırlayanda Allahıma şükür edirəm. Hər duamda hamınız üçün hər zaman sevinclə dua edirəm. Çünki ilk gündən bu günə qədər Müjdənin yayılmasında mənimlə şərik oldunuz. Sizdə yaxşı işə başlayan Allahın onu Məsih İsanın gününə qədər başa çatdıracağına əminəm. Hamınız haqqında belə düşünməyim doğrudur, çünki sizi ürəyimdə daşıyıram. İstər zindanda olduğum, istərsə də Müjdəni müdafiə edib təsdiq etdiyim zaman hamınız lütfümün şərikisiniz. Allah şahiddir ki, Məsih İsanın şəfqəti ilə hamınız üçün necə darıxıram. Budur duam: məhəbbətiniz bilik və tam dərrakə ilə birlikdə daha da artsın ki, ən üstün olanları ayırd edə biləsiniz. Beləcə, Məsihin gününə qədər təmiz və qüsursuz, İsa Məsih vasitəsilə gələn salehlik bəhrələri ilə dolu olub Allahın izzəti və şöhrəti üçün yaşayasınız.
- Efeslilərə 2:8 - Çünki iman vasitəsilə, lütflə xilas oldunuz. Bu, özünüzdən deyil, Allahın hədiyyəsidir.
- Romalılara 5:2 - İman vasitəsilə daxil olduğumuz bu lütfə görə də Ona yol tapdıq və Allahın izzətinə çatacağımız ümidi ilə öyünürük.
- Filipililərə 1:6 - Sizdə yaxşı işə başlayan Allahın onu Məsih İsanın gününə qədər başa çatdıracağına əminəm.
- 1 Yəhya 4:13 - Allah bizə Öz Ruhundan verdiyi üçün bizim Onday yaşadığımızı, Onun da bizdə yaşadığını buradan bilirik.
- 1 Korinflilərə 1:30 - Lakin Allahın sayəsində siz Məsih İsadasınız. O, Allah tərəfindən bizə hikmət, salehlik, müqəddəslik və fədakarlıq oldu.
Allahın lütfü sonsuzdur və O, bizi bu lütfdə yaşamağa dəvət edir. Pavelin bütün məktublarının Allahın lütfü ilə bağlı ifadə ilə başlaması bizi düşünməyə vadar edə bilər ki, bu, sadəcə, adət halını almış salamlaşma sözüdür. Lakin əslində Allahın lütfü bizim təməl dayağımız və Məsihə iman edən insanlar olaraq yaşadığımız mühitdir. Lütf Allahın bizə layiq olmadığımız halda göstərdiyi mərhəmət və lütfkarlıqdır. Biz iman vasitəsilə lütflə xilas olmuşuq və «içində durduğumuz bu lütfə» daxil olmuşuq. Lütf yalnız bir dəfə verilən hədiyyə deyil — o, bütün həyatımız boyunca və əbədiyyətə qədər bizi ayaqda saxlayır. O, bizim həyatımızda fəaliyyətini heç vaxt dayandırmır. Buna görə də Pavel əminliklə deyə bilirdi: «Sizdə yaxşı işə başlayan Allah onu Məsih İsanın gününə qədər başa çatdıracaq». Bəzən özümüzdə salehliyi görmək çətin olur, çünki nə qədər zəif və qüsurlu olduğumuzu bilirik. Lakin hətta bu fərqindəlik bizi Məsihə daha da yaxınlaşdıra bilər. Əgər xilas olmuşuqsa, Rəbb bizim içimizdə yaşayır və biz də Onda yaşayırıq. İsa bizim salehliyimizdir və biz Onda qaldıqca O, Öz bəhrəsini həyatımızda fəal şəkildə yetişdirir. Bu proses təqdis olunma adlanır — Allahın lütfünün bizim xarakterimizi Öz Oğlunun xarakterinə uyğunlaşdırmasıdır. Buna görə də gəlin ilahi lütfdə möhkəm dayanaq və Allahın başladığı işi tamamlayacağına güvənək.
Düşüncə
Bu gün hansı vəziyyətdə Allahın lütfünə xüsusilə ehtiyacınız var və Onun xarakterinizi formalaşdırmasına necə icazə verə bilərsiniz?
