Təqsirin Mənbəyi

Təqsir hissi iki cür olur: biri bizi gizlənməyə sövq edir, digəri isə tövbəyə yönəldir. Tədqiqatçılar müəyyən ediblər ki, insanlar təqsir hissi keçirdikdə çox vaxt özlərini cəzalandırılmış, ruhdan düşmüş, dəyərsiz, rədd edilmiş və təcrid olunmuş hiss edirlər. Bir çoxları güclü özünə dəyərsizlik hissindən danışır — sevinc yoxdur, ümid yoxdur, həyat eşqi yoxdur. Sanki təqsir hissi onların həyatındakı hər şeyi kölgədə qoyur. Belə yaşamaq çox ağırdır. Buna baxmayaraq, çoxumuz həyatımızın hansısa mərhələsində bu hissləri yaşamışıq. Buna görə gəlin sadə bir sualı nəzərdən keçirək: Bu təqsir hissi haradan gəlir? 2 Korinflilərə 7:10-da iki cür kədərdən danışılır. Birincisi, Allahdan gələn kədərdir. Tövbəyə yönəldən bu kədər Rəbbin imansızları Məsihdə olan xilas vasitəsilə Özünə cəlb etmək üçün istifadə etdiyi vasitələrdən biridir. O həmçinin imanlıları Rəbb ilə ünsiyyətini pozan hər şeyi etiraf etməyə yönəldir. İkinci növ kədər isə insanı peşmanlıq və ümidsizlik içində saxlayır. Bu kədər Allahdan deyil, dünyadan gəlir. O, tövbə əvəzinə insanı iflic edir; bizi Allaha yaxınlaşdırmaq əvəzinə gizlənməyə sövq edir və inandırır ki, artıq çox uzağa getmişik, bərpa olunmağımız mümkün deyil. Əgər sən İsanın qarşılıqsız xilas hədiyyəsini qəbul etmisənsə, amma hələ də təqsir hissinin hücumu altında mübarizə aparırsansa, Müqəddəs Yazıların sənə verdiyi bu əminliyə qulaq as: Səni ümidsizliyə və gizlənməyə aparan bu təqsir hissi Allahdan gəlmir. Allah səni azad etmək üçün çıxış yolunu bilir. Məsihdə sən bağışlanmısan və azadsan.