İsa ilə birlikdə olmaq

İsa ilə vaxt keçirmək bizi dəyişdirir və Onun varlığı həyatımızda elə görünür ki, başqaları da bunu hiss edir. Həvarilərin İşləri 4:13–22-dəki parçadakı rəhbərlər, ağsaqqallar və ilahiyyatçılar heyrətə gəlmişdilər. Peterlə Yəhya onların qarşısında dayanmışdılar. Onlar indicə İsanın adı ilə anadangəlmə şikəst bir adamı sağaltmış və xalqa Məsihin dirilməsi haqqında vəz etmişdilər. Onları sorğu-sual edən hakimiyyət nümayəndələri təhsilsiz qalileyalıların çaşqın və zəif müdafiəsini gözləyirdilər. Lakin bunun əvəzinə izah etməkdə çətinlik çəkdikləri aydınlıq və cəsarətlə qarşılaşdılar. Nəticədə, onlar Peterlə Yəhyanın “İsa ilə birlikdə olduqlarını” anladılar (4:13). Bu kiçik müşahidənin arxasında böyük bir həqiqət dayanır: Peterlə Yəhyanı fərqləndirən nə təhsilləri, nə də təbii qabiliyyətləri idi. Əsas məsələ İsa ilə yaxın münasibətləri idi. Bəzən elə düşünürük ki, xristian həyatı Allah üçün diqqətəlayiq bir insana çevrilməkdən ibarətdir. Amma Müqəddəs Yazılar bizə başqa bir həqiqəti xatırladır: Rəbbin axtardığı insanlar təsirli tərcümeyi-hala malik olanlar deyil, Onun yanında kifayət qədər vaxt keçirərək dəyişilməyə hazır olanlardır. Həyatın necə olursa-olsun, İsa ilə keçirdiyin vaxt heç vaxt hədər getmir. Başqaları etdiyin işləri həmişə görməyə bilər, amma ümid edirik ki, onlar kiminlə birlikdə olduğunu sənin həyatından görə biləcəklər.