Sərhədsiz Allahımız

Allahın sonsuz və hər an bizimlə olduğunu, Onun sənə olan məhəbbətinin heç vaxt bitməyəcəyini bilmək sənə təsəlli verə bilər. İsa samariyalı qadına belə dedi: “Allah Ruhdur və Ona səcdə edənlər ruhda və həqiqətdə səcdə etməlidirlər” (Yəhya 4:24). Bu, gözlənilməz bir dinləyiciyə Allahın mahiyyəti haqqında dərin həqiqətlərin açıldığı sakit, lakin əhəmiyyətli bir an idi. Qadın quyuya sadəcə su götürmək üçün gəlmişdi, amma orada Atanın mahiyyətini ona açan Şəxslə — İsa ilə qarşılaşdı. Allahın Ruh olması o deməkdir ki, O, zaman və məkanla məhdudlaşmır. Həyatımızın hər anında hər bir imanlı ilə birlikdədir. Kilsədə hamılıqla ibadət edərkən və ya evdə təkbaşına dua edərkən Onun hüzurunu hiss etdiyimiz zaman bu, Allahın Ruhunun bizim ruhumuzla ünsiyyətidir. Səmavi Atamız fiziki sərhədlərlə məhdudlaşdırıla bilməyəcək qədər böyükdür. İsraillilərin səcdə etmək üçün qızıl buzov düzəltmələri (Çıxış 32:4) Onun sonsuz mahiyyətini anlamadıqlarını və qiymətləndirmədiklərini göstərirdi. Bütpərəstlik insanın öz anlayışına və istəklərinə uyğun gələn məhdud şeyləri sonsuz Allahdan üstün tutmaq cəhdidir. Ata Öz varlığında sonsuzdur və buna görə də bütün xüsusiyyətləri sonsuzdur. Onun məhəbbətinin sərhədi, mərhəmətinin isə sonu yoxdur. Elə günah edə bilmərik və elə dərinə düşə bilmərik ki, Onun məhəbbətlə uzatdığı lütf əlimizin çata bilməyəcəyi yerdə qalsın. Qoy bunu bilmək sənə təsəlli versin: hara getsən də, nə yaşasan da, Səmavi Atan səninlədir.