- Romalılara 5:1–2 - Beləliklə, imanla saleh sayıldığımıza görə Rəbbimiz İsa Məsih vasitəsilə Allahla sülhümüz var. Onun vasitəsilə imanla daxil olduğumuz bu lütfə qovuşduq və Allahın izzətinə nail olacağımız ümidi ilə öyünürük.
- Koloslulara 1:21 - Bir vaxtlar pis əməlləriniz ucbatından fikrinizdə düşmən kəsilib Allahdan uzaq düşmüşdünüz.
- Yeşaya 9:6 - Çünki bizə bir Uşaq doğuldu, bizə bir Oğul verildi; hakimiyyət Onun çiyinləri üzərində olacaq. Onun adı «Heyranedici Məsləhətçi, Qüdrətli Allah, Əbədi Ata, Sülh Hökmdarı» olacaq.
- Yəhya 14:27 - Sizə sülh qoyub gedirəm, sizə Öz sülhümü verirəm. Mən sizə dünyanın verdiyi kimi vermirəm. Qoy ürəyiniz bulanmasın və qorxmasın.
- Qalatiyalılara 5:22 - Lakin Ruhun bəhrəsi məhəbbət, sevinc, sülh, səbir, xeyirxahlıq, yaxşılıq, sadiqlik, mülayimlik və özünə hakim olmaqdır.
Həqiqi sülh münaqişələrin yoxluğu deyil, üçbir olan Allahın həyatımızda fəaliyyətdə olmasıdır. İnsanlar çox vaxt zahiri görünüşlərini, sağlamlıqlarını, maddi vəziyyətlərini və cəmiyyətdəki mövqelərini yaxşılaşdırmaqla rahatlıq və məmnunluq tapmağa çalışırlar. Lakin bunların heç biri qəlbimizdəki dərin narahatlığı aradan qaldıra bilməz. Davamlı sülhü yalnız İsa Məsihlə münasibətdə tapmaq mümkündür. Xilas olmazdan əvvəl Allahdan uzaq idik. Günahımız bizi Allahdan ayırmışdı və bu məsafəni öz gücümüzlə aradan qaldıra bilməzdik. Lakin Allah bizi bu vəziyyətdə qoymadı. İsa Məsih vasitəsilə Özünə gedən yolu açdı və indi Onun sayəsində Ata Allahla barışmışıq. Bu sülh həyatımızda fəal şəkildə işləyən üçbir olan Allahın işinin nəticəsidir. Ata Allah bizi Öz ailəsinə qəbul edib və Öz hüzuruna sərbəst gəlmək imkanı verib. Sülh Hökmdarımız İsa Məsih vasitəsilə çətinliklərin içində belə qəlbimizdə rahatlıq tapa bilirik. Müqəddəs Ruh isə daxilimizdə sülh bəhrəsini yetişdirir. Dünyanın verə bilmədiyi bu sülhə bizim böyük ehtiyacımız var. Çünki həqiqi sülh münaqişələrin yoxluğu deyil, Allahın Özünün həyatımızda mövcudluğudur.
Düşüncə
Siz bu gün həyatınızda Allahın sülhünü hiss edirsiniz, yoxsa dünyəvi məsələlərin verdiyi narahatlıq sizi daha çox məşğul edir?
