Müdrikliklə Yerimək

Rəbb istəyir ki, bizə vermək istədiyi xeyirdualardan həzz ala bilək.

Efeslilərə 5:15-17

Bugünkü hissədə həvari Pavel saleh həyat tərzini necə inkişaf etdirməyi öyrədir. O, ilahi seçimlər etmək barədə üç təlimat verir. O deyir ki...

1. “Həyat tərzinizə diqqət edin” (Efeslilərə 5:15). Özümüzü şüurlu şəkildə qorumağı seçməsək, həyat bizə nə diktə etsə, hərəkətlərimiz barədə düşünmədən sadəcə təbii olanı edəcəyik.

2. “Hər fürsətdən istifadə edin” (ayə 16). Allah hər birimizə Onun planlarında iştirak etmək üçün vaxt və fürsətlər verib. Lakin səmavi Atamızın bizim üçün nə düşündüyünü fikirləşmədən vaxtımızı və enerjimizi başqa işlərə sərf etməyə meylliyik.

3. “Rəbbin iradəsinin nə olduğunu anlayın” (ayə 17). Ən geniş mənada, Allahın bizim üçün iradəsi budur ki, hər birimiz məhz Onun bizi yaratdığı kimi insan olaq və Onun bizim üçün xüsusi olaraq planlaşdırdığı işi görək (Efeslilərə 2:10). Bunu bilərək, seçimlərimizi ruhani bir "süzgəcdən" keçirməli və özümüzdən soruşmalıyıq ki, onlar Atamızın məqsədlərinə uyğundurmu?

Rəbb bizim müdrik şəkildə davranmağımızı istəyir ki, Onun Kəlamında vəd etdiyi və bizə vermək istədiyi bütün ecazkar nemətlərdən zövq ala bilək. Gəlin sadəcə özümüz üçün yaşamaq əvəzinə, hər günü İsa Məsih üçün dəyərli etməyə sadiq olaraq özümüzü Ona həsr edək.