- Zəbur 25:1-7 - Ya Rəbb, Sənə sarı can atıram. Ey Allahım, Sənə güvənirəm, qoy utanmayım, düşmənlərim üstümə gülməsin. Sənə ümid bağlayanların heç biri utanmaz, səbəbsiz xəyanət edənlər utansın. Ya Rəbb, yollarını mənə öyrət, mənə öz cığırlarını göstər. Məni həqiqətinlə yönəlt, mənə təlim ver, çünki məni xilas edən Allah Sənsən, bütün gün Sənə ümid bağlayıram. Ya Rəbb, mərhəmətini və dəyişməz sevginin əzəldən olduğunu xatırla. Gəncliyimdəki günahlarımı və qəbahətlərimi xatırlama, öz dəyişməz sevginə görə məni lütfünlə an, ey Rəbb.
- Yeşaya 55:8-9 - Çünki Mənim düşüncələrim sizin düşüncələriniz deyil, yollarınız da Mənim yollarım deyil, Rəbb belə bəyan edir. Yer göydən necə yüksəkdirsə, yollarım da yollarınızdan, düşüncələrim də düşüncələrinizdən elə yüksəkdir.
Sınaqlar düşüncəmizi qarışdıranda, Allahın Sözü və Müqəddəs Ruh yolu aydınlaşdırır. Güclü qar çovğununda önümüzdəki tanış olan hər şey yoxa çıxır, çünki qar görmə qabiliyyətimizi örtür. Həyatdakı çətinliklər də eyni təsiri zehnimizdə yaradır. Güclü emosiyalar düşüncəmizi bulandırır və düzgün qərar verməyi çətinləşdirir. Belə vaxtlarda Allahın bizə verdiyi üç vədə baxaq: 1. Rəbb bizə yol göstərməyi Öz üzərinə götürüb. Biz Onu gözlədikdə, O, vəziyyətimizə dair anlayış verir. Çünki hər şeyi görür və hansı addımları atmalı olduğumuzu bilir. Amma Onun yönləndirməsi bəzən bizi təəccübləndirə bilər, çünki Onun yolları bizim yollarımız kimi deyil. 2. Allah bizə həqiqəti tətbiq etməyi öyrədir. Allahın Sözü üzərində düşündükcə, Müqəddəs Ruh bizim vəziyyətimizə uyğun hikməti açır və onu necə tətbiq etməli olduğumuzu göstərir. 3. Rəbb bizi yönləndirir və müşayət edir. Valideyn bəzən söz demədən baxışları ilə uşağı yönləndirdiyi kimi, Müqəddəs Ruh da bizə daxilən işarələr verərək qərarlarımızı və davranışlarımızı istiqamətləndirir. Sən hazırda hansı çətin sulardan keçirsən? Bil ki, bu vədlər qaranlıq vəziyyətlərdə sənə yol göstərən işıq kimi xidmət edir.
Düşüncə
Hansı çətin qərarı verməkdə çətinlik çəkirsən və bu gün Allahdan Onun yolunu göstərməsini istəməyə hazırsanmı?
