Uğurun açarları

Heç xristian həyatını yaşamağa çalışarkən ruhdan düşdüyünüz olubmu? Əgər dünyanı yaxşı tərəfə dəyişmək üçün göstərdiyiniz səylər nəticəsiz görünürsə, Rəbbin nümunəsinə baxmaq baxış bucağınızı dəyişə bilər. Məsih insanlara məhəbbətlə xidmət etdi və Onun əməlləri dünyaya böyük təsir göstərdi. Onun uğurunun sirri nə idi? Müqəddəs Yazılar deyir ki, İsa Öz təşəbbüsü ilə danışmır və hərəkət etmirdi, əksinə, Onda yaşayan Ataya güvənirdi və Ata Öz işini Onun vasitəsilə yerinə yetirirdi. Biz də Onun övladları olaraq eyni cür davranmağa çağırılmışıq. Həqiqi xidmət Allah tərəfindən verilir, həyata keçirilir və xeyir-dualanır. Əllərimiz işləyə bilər, amma əslində fəaliyyət göstərən Atanın Özüdür və bütün izzət Ona məxsusdur. Bu, nə böyük təsəllidir! Rəbb yalnız çox istedadlı və ya nüfuzlu insanları axtarmır. Həyatında Ona fəaliyyət göstərməsinə imkan verən hər bir insandan istifadə edir. Biz də əmin ola bilərik ki, O, bizdən istədiyi hər bir işi yerinə yetirmək üçün lazım olan hər şeylə təmin edəcək. Canlı Allaha kim xidmət edə bilər? Əslində, heç birimiz bunu öz gücümüzlə edə bilmərik. Həqiqi xidmət yalnız Uca Allahın bizim vasitəmizlə fəaliyyət göstərməsinə imkan verdiyimiz zaman baş verir. Biz sadəcə Onun əlində olan qablarıq. Nəticələr dərhal görünməsə belə, Allahın həmişə Öz məqsədini həyata keçirdiyinə etibar edə bilərik.