Qorxu ilə necə davranmalı

Həyatın müəyyən anlarında hər kəs narahatlıq və qorxu yaşayır. Amma yaxşı xəbər budur ki, biz bu hisslərin əsiri olmaq məcburiyyətində deyilik. Məsihə iman edənlərin bu bağlardan azad olmaq üçün həm vasitələri, həm də Köməkçisi var.

Qorxuya qarşı durmaq üçün əvvəlcə onun varlığını qəbul etməliyik. Qorxduğumuzu etiraf etdikdən sonra narahatlığımızın səbəbini anlamağa çalışmaq vacibdir. Bəzən niyə narahat olduğumuzu tam bilməsək də, Müqəddəs Ruh bizi bağlayan səbəbi üzə çıxara bilər.

Növbəti addım bu qorxunun gücünü qırmaqdır. Bunun üçün ən güclü vasitələrdən biri “Ruhun qılıncı” olan Allahın Kəlamıdır (Efeslilərə 6:17). Müqəddəs Yazıda bir çox konkret qorxulara cavab yolları var. Bizim vəziyyətimizə birbaşa danışan bibliya ayələrini tapmaq və onlara sarılmaq çox faydalıdır.

Qorxu hiss etdiyin zaman Yeşaya 41:10 ayəsini dua kimi Allaha deyə bilərsən: Ya Rəbb, Sən demisən ki, "Qorxma, çünki Mən səninləyəm, Dəhşətə gəlmə, çünki Allahın Mənəm. Səni qüvvətləndirəcəyəm, Sənə kömək edəcəyəm. Sadiq sağ əlimlə Sənə dayaq olacağam." Mən bu vədə inanıram, çünki Sən heç vaxt yalan danışmırsan. Bu vəziyyətdə Sənə güvənirəm.

Rəbbə güvənmək qorxudan azad olmağın ən doğru yoludur. Hisslərimiz güclü ola bilər, amma həyatımızı onların idarə etməsinə icazə verməməliyik. Allahın çoxsaylı vədlərinə güvənə bilərik və bilirik ki, Onun sevgi dolu qayğısında təhlükəsizlikdəyik.